8

ضيعت وقتي

هذا الشي الوحيد اللي دائما يجي ببالي

ممكن يضيع وقتي لاي احد اعزه

وافني عمري عشانه

بس احس بانتمائي وهذا مو ضرر او استغلال

افتقد الانتماء لاي مجموعه

لانه اهم مجموعه في حياتي ما انتميت لها

يمكن يكون طلبي مستحيل وانا بفكر بطريقة مثالية 

مع اني ماني مثالية 

لكن في ظل غياب التجارب الجأ للافتراضيات 

اللي الكل تقريبا تخلى عنها  

ادري انه في امور كثيرة نص عليها الدين وما اقوم بها

صلة الرحم مثلا ..

انا ما اصل احد لاني اكتئب من الناس

احس بينهم باحساس مؤلم محد يعرفه اللي يجربه

واتمنى محد يجربه

مدونتي ..

بابوح لك باشياء يمكن ماهي متسلسله

لكني فيه مليون شي وشي براسي يشتتني

احس اني في دوامة اسمها انا واحاسيسي

تحمليني

اصلا راح تتحمليني غصبا عنك

لانه مافي احد غيرك اشكي له بكل راحه

وبدون مايضرني

7

احس في الاوقات العادية اني طبيعية ومتفائلة

احس اني مثل اي شخص عادي

لكن لمن اتواجد بين الناس اتوتر

واسكت

ماني مثقفة حيل لكن ما احب اشوف الناس تستحقرني

ونفسي اخذ الامور ببساطة بدون اي حساسية

تمنيت يكون عندي شي يميزني عن البقية

شي واضح وملموس اكون مبدعة فيه

اي شي

رسم .. كتابة .. التصميم

اي شي

اي شي ينفع نعبر به عن كل الخفايا اللي بانفسنا

واللي ماقدرنا ابدا نطلعها لاي احد

ولا نقدر نتكلم ونقولها حتى لا قاربنا 

الله المستعان  

6

تدري اني ماعمره احد من اخواني ربت على كتفي

تدري اني افتقد كثير انهم يكونوا بجنبي

وانت من بين الكل كنت اشوفك اخ

مسكت القماش وكتبت اسمك

وجلست اطرز لك .. وقلت لا اكتمل باعطيك اياه

شفتك محترم .. ماكنت ابي اي احتكاك 

بس مجرد عطفك وخوفك يحسسني بالاهمية

كنت اخاف اتقرب منك عشان ماتتذمر

وتحس انك انبلشت بتقربي

افتقدتكم يا اخواني بهالوقت

افتقدتكم حيل .. افتقدتك يا ابوي وافتقدت حضنك

افتقدت احتوائكم لي ..

مع كل صدمة باحس اني احتاجكم اكثر

اكثر من اي شي اخر

5

من صغري وانا احب اجلس لوحدي

وحتى سوالفي في نفسي وحالي

مافي مصدر لاي سالفة ممكن اقولها

اتذكرهم بايام الجامعه

يوم تعرفت على بنات في ثاني سنه لي بالجامعة

قالت لي وحدة منهم

انتي جميلة واسلوبك حلو

لكن ماتفتحين سوالف

تفضلين تكونين المستمعه فقط

يمكن الجلوس معاك ممل وممكن انتي كمان تملين لوحدك

اتذكر بالرغم من انه هالكلام كان فيه نقد ومدح

لكن مدحهم كان مدح يختلف عن اي مدح اخر

مدح حرك اعماقي .. وكانت اول محاولة للتغير

تغيرت في كل شي حتى جسمي نحف نحف مو طبيعي

الحين كل شي تغير .. حتى انا تغيرت

جاء النت وسحبني من كل واقعي ..

سحبني حتى من نفسي .. صرت ماابي ابطله لسبب

اني ما ابغى واقعي ولا احبه .. ولا ابي الناس

ولا ابي احتك فيهم .. مابي اي كلمه ممكن تجبرني

اتغير .. مع انه في قرارة نفسي ودي من قلبي اتغير

ودي انسى كل الماضي .. واتخلص من عقد النقص

والاحساس يالذنب .. وانسى كل شي صار

واعيش كاي انسان طبيعي

نفسي من كل قلبي

4

ادخل واجلس وقت طويل

ابغى الكلمات تعبر عني بصورة صحيحة

وابغى ابرر اي تصرف خطأ ممكن يصدر مني

حادة الطباع اعرف .. ماهو شي جديد

لكن ليه مايبغوا يسمعوني

وليه احسهم يبتعدوا عني

التعامل معايا صعب .. ويمكن بأظن بالناس ظن خطأ

طيب لو فهمت ينتهي الموضوع وخلاص

صارت عندهم شي كبير

وحكموا علي من خلالها

تمنيت نكون اسرة وحدة

ادفا بينهم .. واحس بجو العائلة

ليه هالموضوع صعب انهم يحققوه

ليه اننا نعيش متحابين امر صعب

مو شرط متحابين

على الاقل بدون مشاكل

: (

3

نفسي ابكي

من قلبي .. واصيح ودموعي تنزل بدون خجل

نفسي هالهم اللي بصدر كله يروح .. وارتاح

نفسي تكون ايامي كلها فرح .. وينتهي الحزن

افتقد اني اكون بدون هموم

افتقدت نفسي .. وافتقدت جو الراحة

انتقادات من كل صوت تجيني وماني عارفة كيف اوقفها

لدرجة انا صرت اتاثر وبقوة مع كل انتقاد

زواج وو ظيفة

اشياء في علم الغيب

ليش يحملوني مسؤولية اني للان ماصارت لي

الله المستعان